[14]
Atticus
Ain tandem? Etiam a Stoicis
ista tractata sunt?
Marcus
Non sane, nisi ab eo quem modo nominaui et postea a magno homine et in primis erudito,
Panaetio. Nam ueteres uerbo tenus acute illi quidem,
sed non ad hunc usum popularem atque ciuilem, de
re publica disserebant. Ab Academia magis ista
manarunt Platone principe. Post Aristoteles inlustrauit omnem hunc ciuilem in disputando locum
Heraclidesque Ponticus, profectus ab eodem Platone.
Theophrastus uero institutus ab Aristotele habitauit,
ut scitis, in eo genere rerum, ab eodemque Aristotele
doctus Dicaearchus huic rationi studioque non defuit.
Post a Theophrasto Phalereus ille Demetrius, de quo
feci supra mentionem, mirabiliter doctrinam ex
umbraculis eruditorum otioque non modo in solem
atque in puluerem, sed in ipsum discrimen aciemque
produxit. Nam et mediocriter doctos magnos in re
publica uiros, et doctissimos homines non nimis in re
publica uersatos, multos commemorare possumus: qui
uero utraque re excelleret, ut et doctrinae studiis et
regenda ciuitate princeps esset, quis facile praeter
hunc inueniri potest?
Atticus
Puto posse, et quidem aliquem de tribus nobis. Sed perge, ut coeperas.
7.
Click on a word to bring up parses, dictionary entries, and frequency statistics